Wai 4.3: THE PHRASE AND THE CLAUSE

Wai 4.3: THE PHRASE AND THE CLAUSE

PHRASE:             

                Tloulhangrapni karbungbi arthari thukyer heiya waiso arthari thukyerchangmak tlou heiya kani phrase toubi ung. Phrase ari subject nimanung predicate khaithutri manimak heiya parts of speech khatdei lhouri churthut manilei. Sentence khatrou phrase khatrouwei duini klei manilei. Dākrei pi sentenceraprou underline toubi kyao tloulhangrap aya kani phrase toubi mu´kril.

               

• Tlaini khuwaranung ramwani kat-malloulei.
• Lhungdoura thür-khngouni marpeibanglei.
• Koutoubi tourouwo bei shunm´tupilo.
• Ani sinayei nathāng lhangai khat nalei.
• Heeng holèhra masanung ombini ipmak.
• Ya teinao pukkanthrinme.
• Hei napawari hnukhu manthrinme.
• Takka āngbi ipmak.
• Mur marchipbi laomak.    
• Douwakhi, aroùh toutermak, mannonaso.

Phrase aya kani lim phlitam thukni khaithutlei. Heirap heiri:

1. Noun phrase
2. Verb phrase
3. Adjective phrase le
4. Adverb phrase.

Noun Phrase: Noun nimanung pronoun heirou dei tloulhāng nimanung affix doplhākbi nounnei lhou churbi klei maniyanung heitoubi nounnei affix doplhāk kya tloulhāng rul heiya kani noun phrase toubi ungrou.

-          Chou thimiya namyerni kanshernalei.

-          Hunikhi aiyei lhangaimak heiya touchimpimak.

-          Hu-hu bi heirou warouwo?

-          Lailik hei marnonanung kákna hoirou.

-          Kanung lhang āni lhou hei churkur.

Verb Phrase: Verb heirou dei tloulhāng nimanung affix doplhākbi verbyei lhou churbi klei maniyanung heitoubi verbyei affix doplhāk kya tloulhāng rul heiya kani verb phrase toubi ungrou.

-          Karyuilei reidang neiyei mairung.

-          Lhangaini mayunga.

-          Karyāllei yakhuwei rungchanri.

-          Beimak lhangailei lungtrim neiyei ukning.

-          Khrangni hunglei neiya murilphananung.

Adjective Phrase: Adjectiveyei lhou tou phrase heiya kani adjective phrase toubi ungrou.

-          Mrao machu uipuiwi heiri huweiyo?

-          Mit peeng douwa khat lamtlaira kanelbi leithung.

-          Che thoh hāng khatra pārlha myeklak.

Adverb Phrase: Adverbei lhou tou phrase heiya kani adverb phrase toubi ungrou.

-          Ani volleyball heiya lhangai-stylerou phitsundalei.

-          Bangei kheenrou nuter-paterrapni chākmāng anmāng chuirilkhou.

-          Khrangei chan napawa heiri hakrungkhi chou tanglei.

-          Asi chaannei nagakarapri lhangaini mle heileime.

CLAUSE:

                Tloulhangrapni karbungbi sentence khatrou subject le predicate kyaoni simthut tlourap heiya clause toubi ung. Clause ari subject le predicate toubi khaithut kya, sentence hoini aitam mayung mani, manimakkei kleikhi kya.

• Laltul malleng thimirapyari uklumkya thimi.
• Nungni royeinung phailoura chà umrou cháthrämaklei.
• Bamkarei chāngdoura antik thartārkhoulei.

Clause aya kani lim khni thukni khaithutlei.

1.       Dependent clause

2.       Independent clause.

Dependent Clause: Aimsa aitam sentence hoini mayung manimak clause heiya dependent clause toubi ungrou.

-          Kothil kartuknara kakhou, heitoubi kallengura.

-          Neiyei hutthul pi lukkhum hei beimak lhangailei.

-          Nung rowanung kei inyam chamakrou.

-          Nang Impāl kathukkanung, pung khyumrou murillase.

Maringa tloura sentence khatrou clause chungni kyao sentence leilei. Heiya clauserap ani subject heiya modify toubi leichilei. Heiya dependent clause toubi ungrou. Kanre kandangni kmu maninanung hannuikhi thithowase.

“Kaiyei cheem kallukrei klei, kartukna cheem heiyei thulkhumrei, yekkul rillei puk, yongchāk trung holehrei donkhou, kābāk knai heengkhuk hei māngura.”

Dourei sentence arouwei sentence phangatam khaithut manilei.

-          Kaiyei cheem kallukrei klei

-          kartukna cheem heiyei thulkhumrei

-          yekkul rillei puk

-          yongchāk trung holehrei donkhou

-          kābāk knai heengkhuk hei māngura.

Kābāk knai heengkhuk hei māngura tou sentence a nimakni deirapri dependent clause thillāngme.

Independent Clause: Aimsa aitam sentence hoini klei mani clause heiya independent clause toubi ungrou. Independent clauserapri chungni simple sentence hoini leilei. Dourei pikur sentenceraprou kani independent clause urthutdase.

-          Kothil kartuknara kakhou.

-          Lukkhum hei beimak lhangailei.

-          Kei inyam chamakrou.

-          Pung khyumrou murillase.

Churnung lhou:

Q1.          Phrase kouya ungo? Hutlha pibi myelak.

Q2.          Clause kouya ungo? Hutlha pibi myelak.